الاسم العالي و المربط الخالي SIB 2017

339
مشينا اليوم عملنا دورة في صالون الاعلامية في الشرقية ، و يا ريتنا ما مشينا، سبت عشية ،معبي للعنكوش ما تلقاش كيفاش دور
قبل ما ندخلو عرضنا واحد يبيع في التساكر متع الدخول بالسرقة ، حاصيلو، يبيع فيهم ارخص ماي في الكاسة ، كيفاش و منين جابهم الله اعلم
مالي تدخل تحس روحك دخلت لسوق موش لمعرض ، العارضين لاصقين برشا لبعضهم و طريقة آلعرض تفكرنا بسوق المنصف باي

« تقدم شوية تلقا فمة شكون عامل ميكرو و يبرح على السلعة « مزال اخر كيت سامسونغ ، شكون يكملو بخمسلاف
ما نحكيلكمش على الوسخ الي مطيش على كبر المعرض ، من اوراق و دبابز و بونتات سواقر ، على ذكر السواقر ، المعرض بلاصة مسكرة و ممنوع التدخين فيها ، و البلايك موجودين في البلايص الكل ، بالرغم من هذا نلقاو عارضين يتكيفو في البلاصة الي يعرضو فيها ، يجاوبو في الحرفاء و السيقارو في يدهم ، خلي عام من المواطنين ، شكون كيفهم يحوس و يتكيف ، و كي يكمل السيقارو بالطبيعةيرميه لوطة
برشا حوانت تبيع اكسسوارات الشنوة كانت حاضرة ، ماركات تاليفونات و حواسيب حاضرة و مشغلين هاتف و مزودين انترنات زادة ، هوني سالت روحي ، الفلوس الي حطوها في المعرض زايدة عليهم؟
الحقيقة ما لقيتش عروض سبيسيال للمعرض ، الاسوام كيف ما نلقاوها في سير الايام هيا نفسها لقيتها في المعرض، الجودة متدنية
علاش نعملو فيه المعرض هذا اذا كان عام بعد عام نزيدو نطيحو في الرداءة ،سوجيفوار زعمة اعطيها الدخل الفلوس و اش يهمها في المحتوى متع المعرض ، عاد كان عملو معرض العروسة خير
المعرض يوفى غدوة ن ننصح الي عامل برنامج باش يمشيلو غدوة ، نقولو خلي فليساتك في جيبك و شد دويرتك في هالبرد ، خاطر كن باش تمشي باش تندم

محمد خليل

Facebook Comments

vous pourriez aussi aimer Plus d'articles de l'auteur

Les commentaires sont fermés.