البوسطة تخرج 3 كوارط في الصيف : كثرة و قلة بركة و الا تشجيع على الدفع الالكتروني

121

e-dinar Travelالصيفية هاذي البوسطة خرجت 3 كوارط ، رافقني ، ديجيكارد و اي دينار ترافل.
الكارطة الاولى، تلنصات اول جويلية ، الكارطة هاذي موش جديدة ، خاطر البوسطة عندها من 2010 كارطة سفر تنجم تصب فيها فلوسك ‘منحة السفر ‘ و تصرفهم في الخارج ، الكارطة هاذي جات باش تكمل الكإرطة القديمة ،كان عندك كونط في البوسطة ، و الا في البانكة و الا حتى ما عندكش كونط جملة تنجم تشري الكارطة هاذي من البوسطة و تاخذها بالوقت ‘ سومها يتراوح بين 35 دينار و 49 دينار ‘.
كان عندك كونط في البوسطة تشريها ب 35 دينار اول مرة و كل عام 25 دينار تجديد .
كان عندك كونط بانكة تشريها ب 39 دينار اول مرة و كل عام 29 دينار تجديد.
كان ما عندكش كونط جملة ، تشريها ب 49 دينار اول مرة و كل عام 39 دينار تجديد.


الكارطة هاذي تجنم تصب فيها منحتك السياحية ‘ 6000 دينار في العام ‘ و تخلص بيها تسكرة طيارة و الا تريزرفي بيها اوتيل البرا، و تنجم زادة كي تبدى مسافر تخلص بيها في قهوة و الا رستورون الخ
الحاجة الجديدة مع الكارطة هاذي انك تتمتع انتي و عايلتك ‘ مرتك و صغارك ‘ بتامين سفر مدة السفر متاعكم ، و التامين هذا يشمل زادة الفلوس ، كان ما مشتلكش الكارطة البرا و الا تبلوكات ، تنجم تكلم شركة التأمين الي متعاقدة مع البوسطة باش تجيبلك فلوس كاش ‘ في حدود 1000 اورو ‘ وين انتي موجود .             باش تاخذو البطاقة هاذي اتصلو بمكتب البريد و هزو بطاقة تعريفكم

 

الكارطة الثنية هيا ‘ رافقني ‘ لنصاتها البوسطة بالشراكة مع شركة ‘لارجاست انفو ‘ ، الكارطة هاذي تلنصات نهارت18 ا وت ، و هيا موجهة للسياح ، و بالتحديد خواتنا المغاربيين ‘الجزائر، ليبيا و المغرب ‘ من حرفاء شركة لارجاست انفو
السايح ينجم ياخذ الكارطة هاذي من اقرب مكتب بريد للحد الي دخل منو برا و الا جوا ، و يصب فيها فلوسو الي ناوي يصرفهم في تونس
الكارطة هاذي جات باش تحد من عمليات تبديل العملة في السوق السوداء ، و باش تحمي السياح من انهم يدورو بمبالغ كبيرة كاش من السرقة و الضياع و البراكاجات .


السايح ينجم يجبد بالكارطة فلوس كاش ، ينجم يخلص بيها في المغازات الكبرى والبوتيكات الي يقبلو الكوارط ، ي ينجم يخلص بيها عالانترنات في تونس .
إلكارطة هاذي صالحة كان في تونس ، و يكفي انو السايح يهز وصل التسجيل الي الي عملو على موقع لارجاست انفو و بسبورو باش ياخذ الكارطة هاذي، الي تمتعو بجملة من الامتيازات عن طريق نقاط الوفاء .

 

الكارطة الثالتة هيا ديجي كارد ، كارطة برشا ناس قالو شنوة تفرق عالايديانر سمارت؟ علاش نكثرو في الكوارط من غير فايدة ؟ الخ
الكارطة هاذي تلنصات موش باش تنافس و الا تمكل الكوارط الاخرين ، لكن الهدف منها انها تعلم صغيراتنا انهم يتعاملو بواسئل الدفع الالكترونية ، الكارطة هاذي ، هيا كارطة افتراضية ‘ورقة فيها نومرو ‘ منجموش نجبدو بيها فلوس من ديستريبيتور و الا نخلصو بيها في المغازات ، موجهة اساسا الخلاص على الانترنات ، و الا باستعمال التليفون .


نجمو نخلصو بيها الترسيم في الامتحنات الوطنية كيف باك و الا نوفيام ، كيف ما نجمو نصبو فيها فلوس في التاليفون .
الكارطة هاذي اي واحد ينجم يشريها ب 1 دينار من البوسطة ، يهز بطاقة تعريفو ، و الا الولي يشريها لولدو ، الكارطة محدودة ب 100 دينار في الجمعة

.

قابلنا سمية العبيدي موكلة باصدار بطاقات الدفع في البريد التونسي و حكاتلنا على الكوارط هاذم بالتفصيل ، و المعلومة الي ختمنا بيها ، انو موقع البريد التونسي باش يصيرلو تحيين في القريب و الفرسيون الجديدة باش تشمل كل خدمات البريد التونسي .
اكثر التفاصيل في الفيديو .

محمد خليل

 

Facebook Comments

vous pourriez aussi aimer Plus d'articles de l'auteur

Les commentaires sont fermés.